ਕਲਾ ਸਾਨੂੰ ਅਸ਼ਾਂਤ ਪ੍ਰਸਥਿਤੀਆਂ ਵਿੱਚ ਸ਼ਾਂਤੀ ਸਿਖਾਉਂਦੀ ਹੈ: ਪ੍ਰੋ. ਅਰਵਿੰਦ
-ਰੰਗਮੰਚ ਉਤਸਵ ਦੇ ਦੂਜੇ ਦਿਨ ‘ਲਿਥੁਏਨੀਆ’ ਨਾਟਕ ਦੀ ਸਫਲ ਪੇਸ਼ਕਾਰੀ
ਪਟਿਆਲਾ, 28 ਮਾਰਚ 2024 : ਕਲਾ ਦੀ ਆਪਣੀ ਇੱਕ ਭਾਸ਼ਾ ਹੁੰਦੀ ਹੈ ਅਤੇ ਸੱਚੀ ਕਲਾ ਆਪਣੀ ਇਸ ਭਾਸ਼ਾ ਰਾਹੀਂ ਹਰ ਮਨੁੱਖ ਦੇ ਮਨ ਤੱਕ ਪਹੁੰਚਣ ਦੀ ਸਮਰਥਾ ਰਖਦੀ ਹੈ। ਕਲਾ ਸ਼ਾਂਤੀ ਤਾਂ ਹੈ ਹੀ ਪਰ ਇਹ ਸਾਨੂੰ ਅਸ਼ਾਂਤ ਪ੍ਰਸਥਿਤੀਆਂ ਵਿੱਚ ਸ਼ਾਂਤੀ ਵਾਸਤੇ ਯੁੱਧ ਕਰਨਾ ਵੀ ਸਿਖਾਉਂਦੀ ਹੈ। ਇਨ੍ਹਾਂ ਵਿਚਾਰਾਂ ਦਾ ਪ੍ਰਗਟਾਵਾ ਪੰਜਾਬੀ ਯੂਨੀਵਰਸਿਟੀ ਦੇ ਵਾਈਸ-ਚਾਂਸਲਰ ਪ੍ਰੋ. ਅਰਵਿੰਦ ਨੇ ਯੂਨੀਵਰਸਿਟੀ ਵਿੱਚ ਚੱਲ ਰਹੇ ‘ਰੰਗਮੰਚ ਉਤਸਵ’ ਦੇ ਦੂਜੇ ਦਿਨ ਕੀਤਾ।
ਥੀਏਟਰ ਅਤੇ ਫਿ਼ਲਮ ਪ੍ਰੋਡਕਸ਼ਨ ਵਿਭਾਗ ਵੱਲੋਂ ਕਰਵਾਏ ਜਾ ਰਹੇ ਇਸ ਚਾਰ ਰੋਜ਼ਾ ‘ਰੰਗਮੰਚ ਉਤਸਵ’ ਦੇ ਦੂਜੇ ਦਿਨ ਰੁਪਰਟ ਬਰੁਕ ਵੱਲੋਂ ਲਿਖਿਤ ਨਾਟਕ ‘ਲਿਥੁਏਨੀਆ’ ਨੂੰ ਹਰਮੀਤ ਭੁੱਲਰ ਦੀ ਨਿਰਦੇਸ਼ਨਾ ਹੇਠ ਖੇਡਿਆ ਗਿਆ।
ਇਸ ਨਾਟਕ ਦੀ ਪੇਸ਼ਕਾਰੀ ਤੋਂ ਪਹਿਲਾਂ ‘ਰੰਗਮੰਚ ਉਤਸਵ’ ਦੀ ਕੋਆਰਡੀਨੇਟਰ ਡਾ. ਜਸਪਾਲ ਦਿਉਲ ਵੱਲੋਂ ‘ਵਿਸ਼ਵ ਰੰਗਮੰਚ ਦਿਵਸ ਸੰਦੇਸ਼ 2024’ ਪੜ੍ਹਿਆ ਗਿਆ ਜਿਸ ਦੀ ਆਖਰੀ ਸਤਰ ਸੀ ਕਿ ਕਲਾ ਹੀ ਸ਼ਾਂਤੀ ਹੈ। ਇਸ ਸੰਦੇਸ਼ ਦੇ ਹਵਾਲੇ ਨਾਲ਼ ਹੀ ਪ੍ਰੋ. ਅਰਵਿੰਦ ਵੱਲੋਂ ਆਪਣੇ ਵਿਚਾਰ ਪ੍ਰਗਟਾਏ ਗਏ। ਵਿਸ਼ਵ ਰੰਗਮੰਚ ਦਿਵਸ ਨੂੰ ਸਮਰਪਿਤ ਇਸ ਸਾਲ ਦਾ ਇਹ ਇਹ ਸੰਦੇਸ਼ ਨਾਰਵੇ ਦੇ ਨਾਟਕਕਾਰ ਜੌਨ ਫੌਜ਼ ਵੱਲੋਂ ਲਿਖਿਆ ਗਿਆ ਹੈ। ਕੇਵਲ ਧਾਲੀਵਾਲ ਨੇ ਇਸ ਨੂੰ ਪੰਜਾਬੀ ਵਿੱਚ ਅਨੁਵਾਦ ਕੀਤਾ ਹੈ।
‘ਕਲਾ ਸ਼ਾਂਤੀ ਹੈ’ ਨਾਮਕ ਇਸ ਸੰਦੇਸ਼ ਉਪਰੰਤ ‘ਲਿਥੁਏਨੀਆ’ ਨਾਟਕ ਦੀ ਪੇਸ਼ਕਾਰੀ ਹੋਈ। ਇਸ ਨਾਟਕ ਦਾ ਪੰਜਾਬੀ ਵਿੱਚ ਉਲੱਥਾ ਪ੍ਰੋ. ਅੱਛਰੂ ਸਿੰਘ ਵੱਲੋਂ ਕੀਤਾ ਗਿਆ ਹੈ। ਇਹ ਨਾਟਕ ਅਜਿਹੇ ਪਰਿਵਾਰ ਦੀ ਕਹਾਣੀ `ਤੇ ਅਧਾਰਿਤ ਹੈ, ਜਿਸ ਨੇ ਪੈਸੇ ਦੇ ਲਾਲਚ ਵਿਚ ਪੈ ਕੇ ਆਪਣੇ ਹੀ ਵੀਹ ਸਾਲ ਪਹਿਲਾਂ ਗੁੰਮ ਹੋਏ ਪੁੱਤਰ ਨੂੰ, ਵਾਪਸ ਆਉਣ ਉੱਤੇ ਮਾਰ ਦਿੱਤਾ ਸੀ। ਪੈਸੇ ਕਾਰਨ ਹੋਏ ਇਕ ਪਵਿੱਤਰ ਰਿਸ਼ਤੇ ਦੇ ਹੋਏ ਘਾਣ ਦੀ ਇਹ ਦਾਸਤਾਨ ਇਸ ਨਾਟਕ ਦੇ ਕਥਾਨਕ ਰਾਹੀਂ ਬਾਖੂਬੀ ਪੇਸ਼ ਹੋਈ ਹੈ। ਨਾਟਕ ਦੇ ਮੁੱਖ ਕਿਰਦਾਰ ਖੁਸ਼ੀ ਗੱਜਣ, ਕੋਮਲਪ੍ਰੀਤ ਕੌਰ , ਗਗਨਦੀਪ ਸਿੰਘ,ਦਲਵੀਰ ਸਿੰਘ , ਅਮਨਿੰਦਰ ਸਿੰਘ, ਗੁਰਵਿੰਦਰ ਸਿੰਘ, ਨਵਨੀਤ ਕੌਰ ਅਤੇ ਹਰਸਿਮਰਨ ਕੌਰ ਵੱਲੋਂ ਨਿਭਾਏ ਗਏ। ਨਾਟਕ ਦੀ ਲਾਈਟ ਡਿਜ਼ਾਇਨਿੰਗ ਰੁਪਿੰਦਰ ਕੋਰਪਾਲ ਨੇ ਕੀਤੀ।